US announce new visa restriction policy for pipo wey dey engage in birth tourism and odas
Wia dis foto come from,Chip Somodevilla/
Published24 September 2026
Read am in 3 mins
US govment don announce new visa restriction policy for foreign citizens wey intentionally travel to di kontri just to born pikin, so dia pikin go be US citizen.
Di Secretary of State Marco Rubio wey announce di informate on Wednesday 23 September, tok say di policy visa restriction go also affect pipo wey dey facilitate birth tourism for di kontri.
“Dis visa restriction policy dey pursuant to Section 212(a)(3)(C) of di Immigration and Nationality Act. Certain family members fit also fall under dis restrictions,” Rubio tok for statement.
Dis new policy dey come few months afta United States govment say dem don end illegal birth tourism schemes, as dem scata one multiple international birth tourism networks for West Africa, North Africa and Europe and withdraw hundreds of visas.
Skip content and continue reading
- Why EFCC declare former Nigeria pension oga Maina wanted again23rd September 2026
- Wetin to expect from African leaders for 2026 UNGA as Shettima, Mahama, Ruto and odas represent continent23rd September 2026
- ‘I be my husband stylist’ – Olu of Warri wife tok about fashion, polygamy and education for Niger Delta23rd September 2026
For June, di Department of States tok say US embassies discova several operations wey allegedly dey use fake documents plus visa “fixers” to help foreign nationals get visa to born for di kontri and secure American citizenship for dia children.
Di department say one US embassy for West Africa bin uncova one network wey involve more dan 100 foreign nationals wey allegedly use fake documents and visa fixers to get US citizenship for dia children.
However, for di latest informate on di mata of birth tourism, di US say di new visa restriction policy go also touch:
- Owners, operators and managers of commercial birth tourism
- Visa fixers wey dey coach applicant to commit fraud
- Foreign medical providers wey knowingly dey abet and facilitate such travel
- and oda individuals wey dey support, abet, and enable commercial birth tourism
Di US govment say di reason why dem dey restrict di visa of dos wey dey engage for dis kain tin and dey benefit from dis “fraud”, na to send clear message say: “United States no go allow foreigners to exploit our immigration system and violate di sanctity of U.S. citizenship.”
Bifor dis latest measure, di Donald Trump administration bin earlier don establish task force to end birth tourism for di kontri.
Di Department of State say di Birth Tourism Prevention Task Force go dey review di activities of visa holders worldwide to identify instances of birth tourism, take action to revoke visas of dose wey engage in or facilitate am, and dismantle di networks “wey dey profit from dis abuse”.
Dem say di task force go address di abuse by analysing and connecting information held across di Department of State and oda federal agencies, including di Department of Homeland Security (DHS).
