How much be di prize money and oda pecks for winners of di Fifa World Cup?
Wia dis foto come from,JORDAN BANK/FIFA/
Published14 minutes wey don pass
Read am in 4 mins
Di final of di 2026 Fifa World Cup don finally arrive – Spain and Argentina go battle each oda for di top prize.
But bifor dat game on 19 July, France and England go jam for di third-place medal for 18 July.
Winner of dat game go get bronze medal, di team wey go finish fourth no go win medal.
Apart from di bragging rights for whoever go win di trophy, di teams go get plenty cash and oda pecks.
In fact, even bifor teams touch down for USA, Canada and Mexico for di tournament, dem already don get some cash.
Skip content and continue reading
- Click here to join BBC Pidgin Whatsapp Channel
- Nigeria govment sama 10 count charges on Orire schoolchildren kidnap suspects17th July 2026
- Why Appeal Court cancel sections of di Electoral Act wey concern primary and membership register17th July 2026
Fifa put $727 million aside to share to di football association of di 48 kontris wey qualify.
Dis na 50% more dan di money dem budget for di 2022 World Cup for Qatar.
Each team wey qualify for di competition bin get $1.5million to cover preparations cost and odas
Skip Di one wey oda users dey read well well and continue reading
Wetin we know about Chidinma Adetsina court case for South Africa
Nigeria govment sama 10 count charges on Orire schoolchildren kidnap suspects- Burkina Faso, Uganda, Niger and oda kontris on America ‘do not travel list’
South Africa anti-immigration leader shot dead, police begin investigation as five suspects impersonating Home Affairs chop arrest
Di 10 African kontris togeda bin get ova $145million in total from dis World Cup, Morocco bin earn di highest afta evritin ($31.5m), sake of say dem reach di quarterfinals.
How much African kontris get even though dem no win di trophy
Wia dis foto come from,MARK METCALFE/FIFA VIA
Each of di 10 teams get plenty cash even though some of dem comot for group stage, wey odas comot for di R32.
Di amount of cash each team get dey based on di stage dem comot di competition.
- Morocco – $31.5m (Quarterfinals)
- Egypt – $17.5m (Round of 16)
- Senegal – $13.5m (Round of 32)
- Algeria -$13.5m (Round of 32)
- DR Congo -$13.5m (Round 32)
- Cape Verde – $13.5m (Round of 32)
- Ivory Coast – $ 13.5m (Round of 32)
- South Africa – $13.5m (Round of 32)
- Ghana – $13.5m (Round of 32)
- Tunisia – $10.5m (Group stage)
All di oda kontris also get cash depending on di stage dem comot di competition.
- 5th – 8th place – $19m
- 9th – 16th place – $15m
- 17th – 32nd place – $11m
- 33rd – 48th place -$9m
Winners go get cash and fresh championship rings
Wia dis foto come from,SCREENGRAB/FIFA
Di winning team go get gold-minted bronze replica of di original trophy wey dem fit keep and display.
Wetin dey at stake na one trophy, gold medals for all players and staff and bragging rights for four years as defending champions.
Di original trophy dey remain for Fifa Museum for Zurich, Switzerland but for di cash, dis na di breakdown
- Champions – $50m
- Second place – $33m
- Third place – $29m
Apart from di cash for di winners, Fifa don introduce wetin dem describe as championship rings.
According to Fifa, one side of di ring dey feature di World Cup trophy, wey di oda side go dey customised wit di identity of di winning team.
Dis na ogbonge American tradition dem dey add to global football.
Fifa go present 30 of di rings to di winning team, and dem go make 1,996 odas available to fans across di world as ‘Fifa Licensed Product’ to allow supporters carry dia own piece of 2026 Fifa World cup history.
Di 2026 World Cup by all standards be di biggest tournament so far, in terms of number of teams (48 teams) and di three host kontris – USA, Mexico and Canada.
In fact, Fifa president also hint say dem go consider plans to increase di number of teams even more.
Gianni Infantino say dem go chook eye for di 64-team proposal for di 2030 tournament afta di end of di 2026 competition.
“We go examine dis issues to see proposals for 64 kontris for di World Cup later afta we finish dis 2026 tournament.”
“E dey important say if you bin dey organise World Cup, e dey important say we go organise am for di whole world, no be only Europe and South America, but di whole world. Every kontri gatz dey allowed to dream to play for di World Cup,” Gianni Infantino tok for interview wit Swiss broadcaster Blue Sport.
E add say “you dey see say di quality of di teams dey high, e go become higher all ova di world. If you no give di smaller kontris chance to participate for di world cup, dem no go dey motivated to improve.”
