Why lawmakers for Nigeria want compensation for victims of anti-immigration protest for South Africa
Published6 hours wey don pass
Read am in 5 mins
Di Nigeria House of Representatives don pass motion to investigate di xenophobic attacks against Nigerians for South Africa, make dem fit document all di economic and material losses wey Nigerians suffer for South Africa.
Dis include properties wey dem leave for di kontri and dia shops wey protesters bin loot and destroy during di anti-immigration protests.
Di lawmakers also tok say di investigation go determine weda di govment of South Africa get hand for di attacks against Nigerians and oda Africans for di kontri, directly or indirectly.
For di House or Reps session on Tuesday, Babajimi Benson wey dey represent Ikorodu Federal Constituency of Lagos State, move di motion for di house to start “a comprehensive legislative enquiry” wey go establish who dey responsible for di attacks.
Benson tok say di enquire go also document di “cumulative human, economic and social consequences of xenophobic violence against Nigerians for South Africa, wit a view to recommending enduring legislative, diplomatic, and institutional for di protection and reparation systems for Nigerians in di diaspora”.
Skip content and continue reading
- ‘I dey depressed’ – Chidimma Adetshina react as deportation case for South Africa kontinu21st July 2026
- Top five Nigerian ministries wey ICPC say get fake workers7 hours wey don pass
- Why boat accidents still dey happun for Nigeria?21st July 2026
Wia dis foto come from,House of Represntatives/Facebook
Supporting di motion, Akin Rotimi representing Ikole/Oye federal constituency of Ekiti State, tok say Nigeria suppose to hold di South Africa govment responsible for dis attacks.
“Di South African govment kontinu to dey make inciting statements. Through acts of omission, dem dey allow dia citizens dem no go do dem anytin,” Rotimi tok.
Anoda lawmaker, Paschal Agbodike from Anambra State, support di motion as e point out say videos don go viral wia South Africans dey loot di homes and shops of Nigerians who bin evacuate from di kontri.
Afta di debates, di speaker of di House, Abbas Tajudeen refer di motion to di joint committees foreign affairs, and oda related committes of di House, to take record of all di property abandoned by Nigerians for South Africa, and determine further action.
Di committees go also recommend appropriate diplomatic, legal and bilateral engagements to make sure say di perpetrators of di attacks dey brought to book, and for Nigerians still living legally for South Africa to dey protected.
Di report of di committees dey expected in four weeks.
Nigeria Ministry of Foreign Affairs bin don first hint say di govment go consider pursuing for compensation for Nigerians wey abandon dia properties for South Africa.
Tok-tok pesin for di ministry, Kimiebi Imomotimi Ebienfa tell di BBC earlier dis month say di issue go dey discussed betwin di two govments “for di highest levels”.
Ebienfa ask all Nigerians wey wan evacuate from South Africa “to document veri accurately all di tins wey dem leave behind in terms of dia businesses and even cars, movable and immovable properties”.
Also, Chrispin Phiri from di South Africa foreign ministry tell di BBC say “transparent claims for compensation go dey assessed on di facts and a case-by-case basis”.
However, anoda govment minister for South Africa, Khumbudzo Ntshavheni, tok say dia govment no go pay compensation for any property wey migrants get tru illegal means.
For one post on her X account, Ntshavheni wey be former Minister of Communications & Digital Technologies, tok say: “I no dey stammer. Any form of property obtained illegally we no go compensate for am.”
More dan 1,400 Nigerians don run come bak to Nigeria since di latest xenophobic attacks on Africans start again for di kontri.
Dem come bak in seven batches of flight wey di Nigeria govment arrange, according to wetin Vice President Kashim Shettima, tell di Ecowas Authority of Heads of States and Govments on Sunday, 19 July.
Shettima, howeva criticise di “xenophobic and afro-phobic attacks” as unacceptable, and togeda wit di govemnt of Ghana, dem call for di mata to enta di agenda of di next African Union meeting.
“Dis go send clear message say dis type of intolerance dey totally unacceptable under any guise. South Africa suppose dey reminded say di freedom wey dem dey currently enjoy na di result of di sacrifices and liberation efforts of African kontris, including Nigeria,” Shettima tok.
South Africa arrest 159 illegal foreign nationals
South Africa say dem don arrest ova 1,200 suspects including 159 undocumented foreign nationals wey dem say go against di immigration act.
South Africa police say dem pack di undocumented foreign nationals for Gauteng province of South Africa during dia operation shanela.
Di arrest dey come weeks afta di rainbow kontri carry out one of dia biggest crackdowns on undocumented migrants in years, following weeks of anti-immigration protests wey see violence, intimidation and looting.
However, di police no tok di nationality of dose wey dem arrest or wetin go happun to dem.
Alreadi, South Africa Department of Home Affairs don block di identity documentsof some citizens, and say make dem go present demsefs to officials.
Dem say dem don begin investigate di validity of some identity documents wey make dem block di IDs.
South Africa say if dose wey dey affected by di blocked IDs no take action, e fit lead to “possible permanent cancellation”.
